Құрылыс басында Қарашөкеев жүр!

Өйткені өңір басшысы Ербол Қарашөкеев әкім болып келгелі әуелі әлеуметтік нысандарды, тұрғын үй, мектеп, балабақша мен ауруханаларды аралап,  нысандардың жайымен, жұрттың жағдайымен танысты. Сондай-ақ шағын аудандарды жаяу аралап, көшелерді жаңғырту, жарықтандыру, қоғамдық көлік санын көбейту секілді талай жылдан бері шешімін таппай келе жатқан мәселелерді шешуден бастады.

Бұл бір қарағанда ұсақ боп көрінгенімен ұзақ жыл бойы шешілмей келе жатқан күрделі мәселе болатын. "Перспективалық дүниелер ғана жасаймыз!" деп халықтың мәселесін қағаберіс қалдырмады. Инфрақұрылымдық проблемаларды ірі инвестициялық жобалардың тасасында қалдырмай, табан тоздырып қала ішін аралап жүруі жұртқа да жақты. 

Күні кеше облыс әкімі Ербол Қарашөкеев Тараздағы көпқабатты тұрғын үйлердің күрделі жөндеу жұмыстарымен танысты.

Қарасу алқабындағы №4, 5, 10, 11, «Аса» (11) шағынауданындағы №11, 12, 19, 21, 23, 32 үйлерді аралап шықты. Көпқабатты үйлердің жертөлесіне түсіп, шатырына шығып, атқарылған жұмыстың сапасын тексерді.

Ербол Қарашөкеев басты талап – сапа мен мерзім кестесін сақталуын қатаң бақылау ұстау керектігін міндеттеп , тұрғын үйлерді қайта жаңғырту жұмыстарын межелі уақытта аяқтауды, тұрғындардың пікірін ескеруді талап етті.

Айта кетейік, 2024 жылы Тараз қаласындағы 53 тұрғын үйді күрделі жөндеу жоспарланған. Бүгінде 40 көппәтерлі үйде құрылыс жұмыстары аяқталып, қалған он үшінде жалғасуда.

Сондай-ақ қайтарым қаражат есебінен Төле би даңғылы №11, «Қаратау» шағын ауданында №37а, 39 үйлер және «Салтанат» шағын ауданында №29а, 29б үйлер күрделі жөндеуден өтті. Коммуналдық меншікте тұрған «Бәйтерек» шағын ауданындағы үш үйдің қасбеттері боялды.

Нәтижесінде, күрделі жөндеуді қажет ететін көппәтерлі тұрғын үйлердің үлесі 43%-дан 39%-ға төмендеді.

Сондай-ақ, облыс әкімінің тапсырмасымен қаланың орталық көшелеріндегі 28 көпқабатты тұрғын үйлердің сәулеттік келбетін жаңарту жобасы қарастырылды. Өткен жылы Төле би даңғылының бойындағы 11 үйдің сырт келбеті мен шатыры жөнделді. Сондай-ақ Желтоқсан көшесіндегі №71 үй жөнделуде. Ал, биыл қалған 16 үйдің сәулеттік келбеті жаңартылып, қала көркін аша түседі.

Қуаныш Арыстанбек "Jambylmedia"