Әулиеатада әк өндіретін жаңа зауыт іске қосылды

Жамбыл облысының «Тараз» индустриялық аймағында жылына 60 мың тонна жоғары сапалы күйдірілген әк өндіретін жаңа зауыт іске қосылды.

          Кәсіпорын өзіне қажетті шикізатты жеке карьерінен алады. Бұл өндіріс барысын толық бақылауға, яғни әктасты қазудан бастап дайын өнім шығаруға дейінгі барлық кезеңде сапаны тұрақты қамтамасыз етуге мүмкіндік береді. Зауыттың өнім өндірушісі – «KazGeoEnergy» ЖШС, өңірдегі 1-сыныпты әк шығаратын жалғыз кәсіпорын.

          Зауыт заманауи технологиялармен және озық құрал-жабдықтармен жабдықталған. Соның ішінде немістің Siemens AG мониторинг жүйесі орнатылған, бұл өндірістің барлық кезеңінде сапаны жоғары дәлдікпен бақылауды қамтамасыз етеді. Жоғары сапалы әктастың өз карьерінің болуы кәсіпорынға толық циклді өндіріс жүргізіп, салада белгіленген қатаң талаптарға сай өнім шығаруға жол ашады.

          Өндірілетін күйдірілген әк экономиканың негізгі салаларында кеңінен қолданылады:

          Құрылыс саласында – байланыстырғыш материал ретінде, силикат кірпіш, цемент, газоблок, сылақ өнімдерін дайындауда;

          Металлургияда – қоспаларды бөліп алу және кенді байыту кезінде флюс ретінде;

          Химия өнеркәсібінде – сода, кальций карбиді, ацетилен, бояу-лак өнімдерін өндіруде негізгі шикізат ретінде;

          Азық-түлік өнеркәсібінде – қант, нан, сүт өнімдерін әзірлеуде, сондай-ақ Е-529 тағамдық қоспасының құрамына кіреді.

          Зауыттың іске қосылуы өңірдің өнеркәсіптік әлеуетін арттыру жолындағы маңызды қадам болып отыр. Жаңа кәсіпорын облыс экономикасына елеулі үлес қосып, жаңа жұмыс орындарын ашуға, импортты алмастыруға және отандық өнеркәсіпті нығайтуға мүмкіндік береді.