Байзақта қылмысты жасырған жоғары шенді полицей қамалды

Ол өзіне бағынышты тағы үш қызметкерімен бірге ұрлық қылмысын жасырмақ болған.   Полицей Құмжота ауылы тұрғынының арызы бойынша тұтқындалды.  

Ауыл азаматы былтыр сәуірде үйдегі сейфінен 11 млн теңге жуық ақша ұрланды деп 102-ге қоңырау шалған. Оқиға орнына бөлім басшысының орынбасары да барады. Сөйтіп «істі қараймыз, ұрыны ұстаймыз» деп кеткен полицейлерден бір ай бойы хабар болмайды. 

Артынша ауыл тұрғыны аудандық полиция бөліміне барып, істің тіркелмегеніне көз жеткізеді. Жәбірленуші бірден прокуратураға арызданған. Тергеу барысында басшы орынбасары қол астындағы қызметкерлеріне қылмыстық істі тіркеп, есепке алмауды бұйырғаны белгілі болды. 

"Ол жерде полиция қызметкерлері қорқыту, басқа да құқыққа сыйымсыз іс-әрекеттер жасап, арызданушыны арыз жазуға бас тартуға мәжбүрлеген. Ашылмаған қылмыс қой, ашылмаған қылмыстардың статистикасы көтеріліп кетпеуін, соның мүдесінде жасалып отыр дейді прокуратура. Бұл жерде енді 7 жылға дейін бас бостандығынан айырылуы мүмкін", - деді облыс прокурорының көмекшісі Жалғас Көшербаев. 

 Қуаныш Арыстанбек - Jambylmedia.kz