Бір маусымда 51 минуттан — 17 матчқа дейін: Мирас Ахаевтың өзгерген рөлі

Тараз футбол мектебін «таланттар ұстаханасы» дейді. Мұнда футболшының қай позицияда өсіп шығатынын алдын ала болжау қиын. Әр жылдары алаңның әр аймағынан өзіне лайық ойыншы табылып келеді. Мирас Ахаевтың тарихы да осы тезиске дәлел бола алады.

«Тараз»-U17 сапындағы футболшының қазіргі маусымын өткен жылмен салыстырсақ, оның командадағы рөлінің қалай өзгергенін анық байқауға болады. Бір жыл бұрын Мирас QJ League аясында бар болғаны 5 матчқа қатысты. Оның барлығында алаңға қосалқы құрамнан қосылып, жалпы 51 минут қана ойнады. Сол кезде оның негізгі міндеті қорғаныстың оң қапталымен байланысты болды. Бұл көрсеткіштер Мирас үшін оңай кезең болмағанын көрсетеді. Бірақ дәл сол аз минуттар кейінгі маусымға дайындықтың бір бөлігіне айналды.

Биыл командаға жаңа бас бапкер Асқар Кушикбаев келді. Жаңа бапкерлік штаб жағдайында Мирас бастапқы құрамдағы орнын бірден иеленген жоқ. Бірақ оның рөлі біртіндеп кеңейе бастады. Ол екінші таймда алаңға тұрақты түрде қосылып, тек бір позициямен шектелмеді. Орталық жартылай қорғаушы, орталық қорғаушы — Мирас үшін бұл позициялар бір маусымның ішінде қатар қолданылған рөлдерге айналды. 

Сандардағы өзгеріс те назар аударуға тұрарлық. 18 турдан кейін — 17 матч. Бір маусым бұрын 5 матчқа ғана қатысқан футболшының биыл негізгі құрамға таласуы оның командадағы салмағы артқанын көрсетеді. Бұл әлі бастапқы құрамның тұрақты ойыншысы дегенді білдірмеуі мүмкін, бірақ бапкер үшін оның функционалдық тұрғыдан маңызды футболшыға айналғанын аңғартады. Мұнда Мирастың әмбебаптығы шешуші фактор болып тұр. Бір позицияға байланбаған ойыншы бапкерге тактикалық тұрғыдан қосымша мүмкіндік береді. Әсіресе маусым барысында жарақат, дисквалификация немесе физикалық жағдайға байланысты құрам өзгерген кезде мұндай футболшының маңызы артады. Мирастың жағдайында бұл теория практикада көрінді. 

Негізгі орталық қорғаушы Батырхан Серікбай дисквалификацияға байланысты «Шахтер»-U17 командасына қарсы кездесуді өткізіп алған кезде, оның орнын Мирас басты. Бұл жай ғана бос орынды толтыру емес еді. Орталық қорғаушы позициясы қателікті кешірмейтін аймақ, сондықтан мұндай матч жас футболшы үшін маңызды сынақ болды. Мирас бұл мүмкіндікті сәтті пайдаланды. Одан кейін команданың сол қапталындағы жағдай өзгерді. Арнат Ералының денсаулығына байланысты қатардан тыс қалуы бұл позицияда мәселе туғызды. Ал Арнаттан басқа сол қапталда тұрақты ойнайтын қорғаушы болмаған жағдайда, бапкерлер штабы тағы да әмбебап ойыншыға жүгінді. Бұл жолы да таңдау Мирасқа түсті. Қазір ол соңғы жеті матчта сол қапталдағы қорғаушы ретінде ойнап жүр. Бір қызығы, оның бұл позицияға дейінгі тәжірибесі де қорғаныспен байланысты: өткен маусымда оң қапталда ойнаған. Осылайша бір футболшының маусым ішіндегі траекториясы қызық көрінеді: оң қаптал → орталық жартылай қорғау → орталық қорғаныс → сол қаптал.

Әрине, бірнеше позицияда ойнау автоматты түрде олардың барлығында бірдей жоғары деңгейде ойнайды дегенді білдірмейді. Әмбебаптықтың екінші жағы да бар: футболшының бір позициядағы мамандануын қалыптастыруға уақыт қажет. Бірақ Мирас жағдайында дәл қазір оның негізгі артықшылығы — команданың қажеттілігіне бейімделе алуы. Сол қапталдағы соңғы алты матчта оның тағы бір ерекшелігі байқалады. Мирас қарсыласпен жекпе-жектен қашпайды, эпизодтарды соңына дейін ойнауға тырысады және қапталдан өтуге оңай мүмкіндік бермейді. Бұл қасиеттер қорғаушы үшін маңызды, әсіресе жас футболшы жаңа позицияда ойнап жүрген кезде. 

Енді маусымның ең қызық интригаларының бірі алда тұр. Арнат Ералы қатарға оралғанда не болады? Бір жағынан, негізгі сол қаптал қорғаушысы өз орнына қайта келуі мүмкін. Екінші жағынан, Мирас осы уақыт ішінде жаңа позицияда тәжірибе жинап, өзін бәсекеге қабілетті ойыншы ретінде көрсетті. Сондықтан мәселе енді «Мирас сол қапталда ойнай ала ма?» деген сұрақта емес. Ол бұл позицияда жеті матч өткізіп үлгерді.

Ендігі сұрақ басқа: Арнаттың оралуы Мирас үшін орынның жоғалуын білдіре ме, әлде керісінше, екі футболшы арасындағы бәсеке «Тараз»-U17 үшін жаңа сапа қалыптастыра ма? 

Мұның жауабын алдағы матчтар көрсетеді. Бірақ бір нәрсе анық: бір жыл бұрын бар болғаны 51 минут ойнаған Мирас Ахаев бүгінде команданың түрлі позицияларындағы мәселелерді шешуге қабілетті футболшыға айналып келеді. 

Ал оның нақты қай позицияда тұрақтайтынын әзірге уақыт көрсетеді.