Жамбылда 1 млн тонна минералды тыңайтқыш шығарылмақ

          Жамбыл облысында «ЕвроХим» ЖШС «Қаратау» фосфорит бассейнінің кен орындарын игеру аясында жылына 1 млн тоннаға дейін минералды тыңайтқыш пен индустриалды өнімдер шығаратын химиялық зауыт салу жобасын іске асыруда.

          Жаңа өндіріс орны экологиялық таза болып, дәстүрлі фосфор зауыттарынан ерекшеленеді: қосалқы өнім ретінде фосфогипс шығудың орнына кальций хлориді және синтетикалық гипс алынады.

          Жоба екі кезең бойынша іске асырылады. Жалпы инвестиция көлемі шамамен – 1 млрд АҚШ доллары.

          Жобаны іске асыру екі кезеңде жоспарланған:

·       I кезең: жылына 800 мың тонна қуаты бар күкірт қышқылы өндірісін салу; жоспарланған мерзім: 2025 жыл

·       II кезең: негізгі өндірістерді іске қосу – дикальцийфосфат, калий сульфаты, кальций хлориді, синтетикалық гипс (химиялық); жоспарланған мерзім: 2026 жыл

          Өндірістік қуаты: жылына кемінде 1 млн тонна минералды тыңайтқыштар мен индустриалды өнімдер.

          Жұмыс орындары:

·       Құрылыс кезеңінде – 2 000 жұмыс орны;

·       Пайдалануға беру кезеңінде – кемінде 1 200 жаңа тұрақты жұмыс орны;

·       сервис кәсіпорындарында/аутсорсингте кемінде 500 жұмыс орны қосымша құрылмақ.

          Қазіргі таңда құрылыс-монтаж  жұмыстары қарқынды жүргізілуде, оған 680 адам мен 77 бірлік техника тартылған.

          Айта кетейік, «Еврохим» – минералды тыңайтқыштарды өндіру бойынша әлемдегі жетекші компаниялардың бірі. Кәсіпорын шаруаларды ауыл шаруашылығы өнімдерінің сапасын арттыруға және егін сапасын жақсартуға қажетті жаңа инновациялық тыңайтқыштармен қамтамасыз етеді.